الدراسات الحديثه اثبتت ان حليب الأم أو الحليب الصناعي المدعم بالحديد يحتوي على كل احتياجات البيبي الغذائية خلال الست شهور الأولى .. سبحان الله الجهاز الهضمي للبيبيات ما يتقبل يهضم غير الحليب .. و ينصحون الامهات ما يقدمون اي نوع من الاكل قبل ما يكمل الياهل ست اشهر .. على ايام خالد كانوا يقولون عادي عطوهم اكل على الاربع اشهر بس الافضل الانتظار للست شهور .. و خالد مسكين عطيته اكل قبل ما يكمل الاربع اشهر –اول واحد و ابغي اجرب فيه كل شي- .. لكن بسامي انتظرت لخمس اشهر بالضبط .. و هيونه اذا الله قدرني بنتظر يلين ما تكمل الست شهور ان شاء الله . تقديم الاكل قبل الست شهور ممكن يسبب عسر هضم او حساسيه للبيبي .. للأسف في اعتقادات ان الاكل يسكت الياهل لانه بيكون شبعان و ما بيصيح و يخليه يرقد الليل بطوله

هذا كرسي السيارة خذناه حق هيا .. خذناه من محل ماماز اند باباز .. ما ادري شو الي خلاني آخذه من هناك .. لان الكرسي مافيه اي شي مميز عن كراسي مذركير .. بالعكس سعره اغلى و ثجيل و خيارات الالوان محدوده .. و القاعده الي يتركب عليها الكرسي في السيارة ما تكون معاه .. تشترونها منفصله .. و بعد عشان الكرسي يتركب على العربانه لازم نشتري قطعة من المحل نركبها على العربانه عشان تمسك الكرسي

فوائد ركوب الخيل

• يحسّن التوازن ويقوي العضلات
• يحسن التنسيق بين العضلات ويسرّع استجابتها
• يزيد سيطرة المخ على العضلات
• يزيد السيطرة على وضعية الجسم
• يخفف التشنج
• يزيد في مجال حركة المفاصل
• يمدد العضلات القاسية والمتشنجة ويرخيها
• يزيد القدرة على التحمل
• يحسن إدارك مجال الرؤيا
• تعزيز الثقة بالنفس
• تعزيز الإعتبار الذاتي
• السيطرة على العواطف
• تطوير القدرة على الصبر
• تحسين قدرات تقدير المخاطر
• تخفيض مستوى الضغط الإجهادي
• تقوية الشعور بالإنتماء الإجتماعي

و الحمدلله خالد بدأ دروس الفروسيه في نادي ابوظبي للفروسية .. ساعة مره وحده في الاسبوع .. لا بأس بها الساعة ، خصوصا انه يدرب مع مجموعة .. الشي الوحيد الي مش عاجبنا في النادي .. مابا اقول لهجة المدربات الانجليزيه الصعبه .. لانهن اوربيات ما يتكلمون الانجليزي كلغة اولى ، فأحيانا يصير صعب فهم شو يقولون .. لكن ماعليه متغاضين عن ها الشي .. بس الشي الي صدق يقهر ، ان التدخين مسموح به هناك .. و ياريت شفت مره ولي امر يدوخ .. لا .. المدربات نفسهن الي يدخنن .. و علني جدام اليهال .. عافانا الله .. اتمنى الاداره تمنع التدخين و يفكونا من لوعة الجبد

نقدملكم الاموره “هيا” الي شرفت في تاريخ 29/11/2008 .. و يسعدنا انضمامها لطاقم المدونه

الحمدلله اكتشفت ان مادة التربية الوطنية الي ياخذها خالد في المدرسة لها فايده بعد ما علق على مبارة الامارات و ايران -تصفيات مونديال 2010- يوم قال : “الحين اذا الامارات فازت على ايران لازم يرجعون لنا طنب الكبرى و طنب الصغرى و ابوموسى” .. و شكثر كنت فرحانه ان كلموهم عن ها الموضوع و هو وايد متأثر فيه .. من العام كان ياخذ تربيه وطنيه بس الماده مالها اي تأثير لانها مره وحده في الاسبوع .. يعني حتى الاجتماعيات الي ياخذونه بالانجليزي تأثيره اكبر -انتو خمنو السبب-

و راح خالد يرقد قبل ما تخلص المباراة .. و للأسف ما فازوا مثل ما انتو عارفين .. بس ما ادري اذا كانت نتيجة المباراة في مصلحتنا او لا خصوصا عقب ما عق خالد كلمته .. الله اعلم

و أخيرا وقعت العقد مع كرايو سيف عشان الاحتفاظ بدم الحبل السري .. انا ما بتكلم عن فايدة الاحتفاظ بها الشي لان وايد مقالات انكتبت بها الخصوص .. كنت افكر بها الشي من ايام خالد سنة 2001 .. طبعا كنت في امريكا .. بس يوم قريت في العقد ان الاهل مالهم خص اذا البنك استعمل منه في بحوث او دراسات خفت .. خفت عقب كمن سنه اشوف خالد مستنسخ او شي من ها القبيل و هونا .. و يوم بسامي ما فكرت بالسالفه .. لكن ها المره كنت جاده في الموضوع خصوصا ان في الامارات مب موجود هذا البند .. بصراحه كنت واااااااااااااااااااايد متردده بها الخصوص عشان تأخرت يلين الحين في توقيع العقد .. بس يمكن لانه شي يديد علينا .. او لان في احتمال فشل او تضرر العينه .. ما ادري و الله .. بس ليش الواحد ما يستغل اي فرصه ممكن يستخدمها اذا احتاجها في المستقبل .. الواحد ما يتمنى المرض طبعا بس ضمان ان شاء الله .. و كل شي بيد الله سبحانه و تعالى .. و اتمنى تنجح معانا العمليه و تم على خير
رابط موقع كرايو سيف في الامارات

نمبر ووركس ان ووردز .. اسم معهد لتعليم الرياضيات و الانجليزي .. والدة احد زملاء خالد خبرتني عنه .. مكانهم في حدائق الراحه في بوظبي .. و عطتني رابط موقعهم .. انا شفت الموقع و اكتشفت انه مكان يقدم دروس تقويه او يساعد الطالب في دروسه بشكل احسن من المدرسه .. كنت متحمسه احط خالد بس عقب تراجعت ، لاني ما ابغي تقويه .. ابا اشياء فيها تحدي او تقدم الرياضيات بشكل يديد .. لكن قلت خلني اخبركم عنه يمكن حد يستفيد .. و اعتقد هم يسوون امتحانات تحديد مستوى قبل الدخول .. بحط رابط موقعهم و اضغطوا على علم الامارات بتحصلون ارقام التيلفونات هنه في الامارات .. اتصلوبهم و هم بيعطونكم المعلومات الي تبونها
رابط موقع نمبر ووركس ان ووردز

بصراحه ما كنت اعرف ان الليدي بيرد اسمها دعسوقه الا يوم خالد كان في الكي جي .. المهم .. معلمة العلوم طلبة منه يسوي مجسم او لوحه لدورة حياة اي كائن حي .. و نظرا للظروف الراهنة و عدم توفر الاغراض و الحاح خالد بضرورة سرعة العمل .. ما كان فينا الا نستخدم ما هو متوفر في المنزل و دخلنا المطبخ و سوينا عجينة الطين الي تقدرون تستخدمونها في الاعمال اليدويه عشان نشكل مراحل تطور الدعسوقه .. و قصينا ايبس غضن في البيت عدنا -وكان خفييييييييييف و معرض للكسر اي وقت بس ان شاء الله لا- و الوان لدهن المجسمات و صمغ .. شكلنا الطين و طبخناه و انتظرناه يبرد .. و بعدين لوناه و افضل الالوان هي الوان الاكريلك Acrylic Paint لصبغ الطين .. و انتظرنا الصبغ يجف و بعدين سوينا ثبتنا المجسمات على الغصن و كملنا الشغل .. و على قولة خالد المعلمه استانست وايد و ما حطت مجسمه مع باقي الاولاد ، حطته على مكتبها في غرفة المعلمات .. خير و بركه لاني كنت احاتي حد من الاولاد يكسر الغصن من خفته بعطيكم مقادير العجينه كوب و نص طحين نص كوب ملح نص كوب ماي و اعجني .. اعجني .. اعجني يلين ما تصير العجينه مطاطه و مرنه .. بعدين شكليها على كيفج او خلي اليهال يشكلونها مثل ما يبون .. بعدين حطوها في قالب و في فرن حار تقريبا 45 دقيقه يلين ما تيبس و بعدها محافظه على لونها الابيض خلوها تبرد بعدين لونوها .. خل الالوان تجف بعدين ردوا دخلوها الفرن شوي كان ودي احط صور بالتفصيل .. بس ما حصل .. الحمدلله اني صورتها في السياره ، لاني كنت معتمده اصورها في المدرسه بس ما لقيتها في الفصل -قلتلكم وين-

في حملي هذا قررت اني ما اكشف عن جنس الجنين ، لان الحمدلله عندي بنت و عندي ولد .. و معظم الي يسألني و اقوله اني ما اعرف يتحسبني كذابه .. بعضهم كان يقولي كيف بتجهزين و انا اقنعهم و اقول التجهيزات و الملابس حجه عشان نحن نعرف جنس البيبي .. و اذا على الملابس بشتري الي يعجبني سواء لبنت او لولد

و اكتشفت ان قراري كان غلللللطط .. لان كل ما ايي اشتري ازرق او وردي اتراجع لاني محتاره .. ما كنت متوقعه اني بحتار .. و في النهايه كانت كل مشترياتي باللون الابيض و البيج .. الوان ممله و كرهيتها -بعد ما كنت احبها- .. و عشان اعوض نقص الالوان ما قدرت اقاوم ما اشتري ها اللحاف من زارا هوم

شكله قبيح .. و كل الي راويتهم اياه ضحكوا عليه .. بس جذبني !