المدرسة رشحت خالد يشترك في جائزة الشارقة لحفظ القرآن و الحديث .. فئة الحديث لمن دون التاسعه .. كان وده يشترك في فئة القرآن .. بس دون التاسعه لازم يكونون حافظين جزء عم و جزء تبارك .. السنه اليايه ان شاء الله اذا توفرتله الفرصه

القرآن:

لمن دون التاسعه (جزء عم و جزء تبارك) .. فوق التاسعه (خمس اجزاء على ما اذكر)

الحديث:

لمن دون التاسعه عشرين حديث .. فوق التاسعه ثلاثين حديث

و الاحد الي طاف كانت المسابقة .. و طلعوا من بوظبي للشارقة ، خالد و ناصر ربيعه اصغر مشاركين من المدرسه -فديتهم عنونين- و شكلهم يضحك ما كانت هامتنهم المسابقه بكثر ما همتهم الرحله و ركوب الباص .. أنا عارفه ان خالد ما بيفوز خصوصا بوجود الاعداد الكبيره من المنافسين من كل الامارات و لان بعده بعض الحروف ما ينطقها عدل ، بس اهم شي فرصة المشاركه الي منحته اياها المدرسه .. و طبعا ما يحتاي اتكلم عن فضل اقوال الرسول ، و الحمدلله صار عنده فضول كبير في معرفة قصص الصحابه بعد ما كلمته عن الصحابه الي رووا الاحاديث الي كان يحفظها .. و لو تشوفونه -بسم الله عليه- كل يوم شايل كتاب اصحاب الرسول يباني اقراله قصة صحابي .. اقوله ما اقدر لازم الخصلك اياها قبل ما نقراها من الكتاب القصص طويله و ما بتسوعبها .. و ها الي ان شاء الله ببدأ اسوي متى ما الله راد ، بلخصله هو و بسامي قصص أصحاب الرسول عشان اقصها عليهم

و أشكر الاستاذه منى على الجهود الي بذلتها مع خالد و ربعه .. يزاها الله خير