خالد و بسامي زارو المعرض خلال الاسبوع الي طاف -ما شتروا و لا كتاب الا دفتر تلوين شرته بسامي- لانهم انشغلوا بالفعاليات الي كانت موجوده للأطفال ، و شافوا قوم ام خماس و شاركو في المسابقات -و الحمدلله في آخر لحظه خالد قدر يجاوب على سؤال و يحصل جائزه لان بصراحه كانت فوضى اليهال الكبار عافدين عفده و انا كنت ابا اسحب عيالي باي شكل و نروح بس كان عادي عندهم -يهال- بعدين راحوا المرسم و رسمو -تقريبا ساعه كامله- .. و بعدين تفاجأنا ان خالد رسمته عجبت التحكيم -اصلا ما كنا ندري ان في تكريم و هدايا- و عطوه درع .. حطيتلكم صورته و استانس و انا استانست له طبعا ، بس تضايقت لاني كنت بصدق مقولة “الدنيا حظوظ” .. لان بصراحه رسمة بسامي هي الي كانت تستحق التكريم -رسمتها روعه و كمتذوقه للفن اقدر اقول ان شغلها اكبر من سنها و ترسم تفاصيل انا الكبيره ما افكر ارسمها اذا بغيت ارسم معاهم- كلهم عيالي و اتمنالهم الخير و الحمدلله بعدني على مبدأ “لكل مجتهد نصيب” ، و اقنعت بسامي ان عشان الزحمه ما قدروا يقيمون رسمتها و الا بيعطونها اكبر جائزه

و يوم ثاني رحت انا عشان آخذ كتب حقي .. بس لا اراديا كنت اروح صوب الكتب التربويه .. و خذت كتاب وايد حلو من دار النشر السوريه شعاع يتكلم عن تهيأت الطفل قبل المدرسه و فيه صور -وايد حلو و مع انه عيالي في المدرسه بس بسوي معاهم دورة تنشيط ذاكره و تسليه- .. و بعد كان فيه دار نشر اسمها “الكتاب التربوي” كل كتبهم للمدرسين و التربويين و في كمن كتاب للآباء .. و خذت عنهم ثلاث كتب بعد اقدر اقول جدا رائعه و بس اقراهم بدون عنهم ان شاء الله

المعرض بشكل عام كان وايد حلو صح عدد المشاركين اقل من معرض الشارقه بس كان صغير و ملموم و الواحد ياخذ راحته فيه و فيه عارضين جذبونا مثل شرطة بوظبي -خذنا عنهم لستة النقاط السودا- .. و جناح كتاب 1001inventions بس بعدهم ما ترجموه و على كلامهم بيخلصون الترجمه السنه اليايه -ما فيني بصراحه اقراه بالانجليزي عشان جي بنتظر-.

و سلامتكم