احباط الاطفال
العيال دايما يعتقدون ان ما في شي يصعب عليهم و كل شي يقدرون يسوونه بنجاح .. و إذا تلخبطوا و اخطؤوا تشوفون حالات الاحباط و الزعل الي يتعرضون لها .. نفس الحاله الي عندي .. خالد دايما على باله انه يقدر يسوي اي شي ، و اذا ما قدر تيه حالة احباط و يأس و صياح و بكاء .. و بالزور يهدى .. يمكن ها الشي الي خلاني ابحث عن موضوع مواجهة احباط الاطفال و كيف نواجه و نعالج ها السالفه
أكيد كأم ما تبغين تعترفين حق ولدج بعدم مقدرته بعمل شي معين ، بس في ها الوقت و اذا استخدمتي التصرف الصحيح بتعلمين ولدج كيف يواجه تحديات عمل شي معين في المستقبل .. وفي دراسات سووها تخص ها الموضوع و اكتشفوا ان الطفل الي يقدر يواجه الاحباط ، مع الوقت يكون عنده ثقه و احساس افضل بنفسه اكثر من الطفل الي ما يقدر يتصرف مع حالات الاحباط .. و ايضا بينت الدراسات ان ها الطفل في المستقبل يكون انجح في حياته العلمية و العملية .. و دايما ذكري ولدج انج حتى انتي كشخص كبير تغلطين و اذكريله مثال عملي –حرقتي العشاء مثلا- و هاي مش نهاية الدنيا.
هناك خمس استراجيات لتعليم الطفل مواجهة حالات الاحباط او الفشل:
- وضحي للطفل اساس المشكله و لا تتهمينه بالغلط .. يعني .. شوفوا ها المثال العملي من عندي و عند خالد .. اذا قعدت احفظه قرآن و استمر في اللخبطه و عدم المقدره على حفظ آيه معينه .. على طول يزعل و يقول انا ما اقدر و يبطل حفظ .. بس اقوله يمكن انت تعبان او في شي في بالك تبغي تقوله و مش مخلنك تركز؟ .. نحاول نعرف السبب و بعدين نرجع لحفظنا .
- خمني اللحظة الي ممكن يحبط فيها طفلك .. مثلا اذا كان يلعب بالمكعبات و قبل ما ينفجر بالصياح اذا ما قدر يبني شكل معين .. اقعدي معاه و قوليله انج لو كنتي مكانه ممكن تتصرفين بها الشكل او تحطين ها المكعب بدال المكعب الثاني عشان ينجح بنيانه .. و انت جالسه معاه عطيه رايج او خيارات ممكن يسويها .
- لاحظي مشاعرها .. يعني –و تصير عندي دايما- اذا كان خالد يلون و ما عجبه تلوينه ، يزعل و يفرفر القلامه و يمزق الورقه .. احاول ما اعصب عليه للشي الي سواه –هو اصلا متضايق ليش اعصب عليه- ، بس اطلب منه يلم الفوضى الي سواها ، و اقوله يروح يسوي شي ثاني .. بس في المقال مذكور انج تقدرين تطلبين من طفلك يفرغ طاقة الغضب في عمل رياضة معينه او تعلمينه يردد بعض الجمل مثل “انا هادئ” او “اقدر اواجه ها الشي” .. بس من رايي افضل شي ممكن تعلمينه طفلك يقوله “لا حول و لا قوة الا بالله” .
- اعرفي متى تتراجعين .. احيانا محاولة الام انها تساعد ولدها تحسسه انه ما يقدر يسوي شي بدونها و ها يزيد الطين بلة لانه بيفقد الثقه بمقدرته .. مثلا اذا كان يركب لعبه و غلط لا تقوليله هات بسويها عنك .. لا .. خليج قريبه منه ، بيحس انج موجوده متى ما يحتاجك و في نفس الوقت تراه يحاول الي يقدر عليه عشان يركبها .
- حافظي على هدوئك .. اذا تصرف الطفل تصرف طلعج من طورج –بردي اعصابج و حاولي تهدين- فقدج لاعصابج ما بيساعده و بيخليه يزيد في التصرف الخاطئ ، و بيعلمه ان الغضب افضل طريقه لمواجهة الاحباط .
كثير من الاهالي يحاولون ما يعرضون عيالهم لحالات احباط .. يمكن ها الشي يكون خطأ .. نعلمهم من يوم هم صغار كيف يواجهون الصعاب افضل .. يكتشف نفسه و تقوى مشاعره .. و هذا ان شاء الله تعزيز لذاته .
و بارك الله و جزا الله خير كل ام و اب يحرصون على كل كبيرة و صغيرة في تربية عيالهم .
