قبل فترة قررنا انا و اختي .. نودي الصغاريه مكان مش متعودين عليه كتغيير جو -يمكن يكون قرار خاطيء لبعض الاطفال- .. و خبرناهم انا بنروح مول الامارات و بنلعبهم في الحديقة الثلجية .. يلين هنيه ماشي مشاكل .. و صلنا و هم مستانسين و شرينا التذاكر كانت ب70 درهم .. شامله الملابس الواقيه من البرد و الدلاغ و البوت و مش شامله القحفيه و القفازات -طبعا القفازات ضروريه و لازم تشترونها من المحل الي هناك- .. الصدمه الاولى انهم ما ولد اختي لانه اقل من ثلاث سنوات ..في يا حظها خذته و راحت تتسوق و هو كأنه متفق مع امه رقد اول ما وصلنا

استغفر الله العظيم ابتلشت بالثلاثه .. يعني تخيلوا انكم تلبسون ثلاث اطفال عدة الثلج في نفس الوقت و هم يتنططون و ميتين من الفرحه .. الحمدلله لبسوا و هاذم باللبس و شوفو الفرحه على ويه خالد و لاحظو ويه بسامي

و هذا المدخل و هني كانت الصدمه الثانيه .. كان فيه شخصيات تنكريه -ناس كبار لابسين ملابس حيوانات- و هاذيلا من تشوفهم بسامي تيها حاله هستيريه ما تحبهم .. فتميت شالتنها طول الوقت

حبيبي خالد متعود على الثلج مال امريكا فيوم دخل و شاف الارضيه كلها بيضا تحسبه ثلج صدقي و رمى عمره باكبر قوه عنده على الارض عشان اونه يسوي سنو انجل .. و الارضيه ياااااااااااااااااااااااااااااااااابسه وطلع صوت كأنه انفجار خفيف تحسبت ظهره انكسر بس من الوناسه قام يركض جنه ما صار شي

هنيه يتزحلقون

و هاي صوره ثانيه للزحليقه

و ها منظر قلت خلني اصوره .. و كنت بصور زياده لولا بسامي الي متعلقه فيني

و هنيه عند الطلعه كان فيه بعض الالعاب بسامي شوي تحركت و لعبت دقايق بسيطه لانها حست انها برع الحديقه

في النهايه اقول .. المكان لا بأس به حق اليهال يمكن لو ما غصصت علي بسامي جان استانست وياهم .. و لو ما يابو هاذيج الشخصيات جان بسامي استانست .. بس ما شاء الله خالد و ميمي وااااااااااااااااااااااايد استانسو .. و المفاجأة الحلوه ان قبل ما نطلع فازت بسامي بجائزة و طلعت من عندهم بكيس مليان حلويات و تذكره مجانيه حق المره اليايه من غير الكوبونات الثانيه .. الحمدلله يت من الله ترضيه الها على حالة الرعب الي مرت فيها و هي هناك
كانت تجربه حلوه و تغيير حق الصغاريه .. بس ما بنعيدها في القريب العاجل