فعاليات اسبوع القراءة في مدرستنا
2008 26th, يناير
مر علينا اسبوع القراءة الي سوته مدرسة الاتحاد على خير و بركه و الكثير من طرايف العيال .. كان فعلا اسبوع مميز و حبوه الصغاريه .. و انا بعد لان طول الاسبوع ما عطو خالد واجبات غير واجب قراءة سيرة الرسول صلى الله عليه وسلم طول الاسبوع .. كان كل صف مختار قصه يمثلونها و يتكلمون عنها طول الاسبوع ، و آخر الاسبوع كل صف سوا مسرحيه بسيطه على قصته .. بالاضافه الى المعرض الي سوته المدرسه حق الكتب .. خالد طلب فلوس عشان يتشرى ، كان ممكن اروح معاه و اخليه يشتري و انا ادفع بس قلت خله يجرب بروحه احسن .. و لما عطيته مبلغ -بسيط نوعا ما- ما عجبه و قالي شو ها ، الفلوس هاي شويه ما اقدر اشتري بها شي .. بس تيب كتاب واحد -متأثر الاخ بموجة الغلاء- .. المهم عطيناه المقسوم .. و حبيب قلبي يا من المدرسه اليوم الثاني شارلي كتاب طبخ و شاري حق اخته كتاب و و كتابين و سيدي العاب حقه .. احلى شي صديقه عزم ربعه على مقصف المدرسه بالمبلغ الي عطته اياه امه حق الكتب .. فديتهم يضحكون هذا كله و هم صف اول ابتدائي الله يستر من السنوات اليايه
و الاخت بسمه كانوا طالبين منها زي دبدوب .. عاد انا قلت خلني اكون مبدعه و بدال ما اشتريلها اللبس اسويلها شي في البيت بنفسي -السالفه مش سالفة ابداع بس مافيني اسير السوق- .. وطلعت صورة وجه دبدوب و كبرتها و طبعتها و قصصتها و خرمت العيون و سويت فتحات على جوانب الويه و حطيت لاستيكات عشان تثبته على اذنها و تمثل دور الدبدوب .. يوم عطيتها اياه و قلتلها خذي ها عطيه المس عشان المسرحيه .. قالت شو ها انا ما البس هاي الورقه ، انا ابا ثياب دبدوب مثل صديقتي .. و الله يا بنتي الشرهه مش عليج الشرهه على الي يالس يتفننلج .. قلتلها خلاص خذي ها العبي فيه و ان شاء الله عقب بشتريلج .. قالت اوكيه ييبيلي اياه بسرعه اول ما تشترينه .. الله يعيني عليهم
بالاضافه للورشه مالت الامهات و الي لخصتها لكم في الموضوع السابق .. بعد اليهال سووا بوك ماركس .. و بعض الامهات تبرعوا بالقراءة لصفوف عيالهم .. قريت حق صف خالد كتاب “أبناء القمر”
.. و انصدمت من اليهال ما يعرفون الاشهر القمريه و لا حتى السنه الهجريه .. على الاقل خالد كان ماخذ فكره عنهم من نشيدة the months of islam من البوم يوسف اسلام I look I see 
و الاخت بسمه كانوا طالبين منها زي دبدوب .. عاد انا قلت خلني اكون مبدعه و بدال ما اشتريلها اللبس اسويلها شي في البيت بنفسي -السالفه مش سالفة ابداع بس مافيني اسير السوق- .. وطلعت صورة وجه دبدوب و كبرتها و طبعتها و قصصتها و خرمت العيون و سويت فتحات على جوانب الويه و حطيت لاستيكات عشان تثبته على اذنها و تمثل دور الدبدوب .. يوم عطيتها اياه و قلتلها خذي ها عطيه المس عشان المسرحيه .. قالت شو ها انا ما البس هاي الورقه ، انا ابا ثياب دبدوب مثل صديقتي .. و الله يا بنتي الشرهه مش عليج الشرهه على الي يالس يتفننلج .. قلتلها خلاص خذي ها العبي فيه و ان شاء الله عقب بشتريلج .. قالت اوكيه ييبيلي اياه بسرعه اول ما تشترينه .. الله يعيني عليهم
بالاضافه للورشه مالت الامهات و الي لخصتها لكم في الموضوع السابق .. بعد اليهال سووا بوك ماركس .. و بعض الامهات تبرعوا بالقراءة لصفوف عيالهم .. قريت حق صف خالد كتاب “أبناء القمر”
.. و انصدمت من اليهال ما يعرفون الاشهر القمريه و لا حتى السنه الهجريه .. على الاقل خالد كان ماخذ فكره عنهم من نشيدة the months of islam من البوم يوسف اسلام I look I see تقدرون تسمعونها اذا ضغطوا هنيه
