Action Zone أكشن زون / بوظبي
الحمدلله في الصيف اكتشفنا اكشن زون .. مع ان دوم نمر عليه ، بس و لا مره فكرنا نسيرله -كله على بالنا حق العيال الكبار مع ان العكس صحيح- .. مكان وايد حلو .. و واسع .. و متروس العاب .. متنوعه .. و ما في زحمه .. و فيه مسيد .. و مطعم .. و كل وسايل الراحه .. و اسعاره مناسبه
بس عندي بعض الملاحظات عليه -مافي شي كامل و الكمال لوجه الله-
- كم مره سرنالهم و العاملات هناك بعدهن يخمن بالمكينه الكهربائيه مع انه يوم ويكند و المفروض يكونون مستعدين من اليوم الي قبل ، انا كل الي احاتيه واير الكهرباء .. و مره وحده تخم و ياره البلك وراها .. وين السيفتي
- مكينة التصوير الفوتوغرافي مال هيلو كيتي -و الي كل مره بسامي تبا تصور فيها- مخلص حبرها ، و كل ما نخبر الريال المسؤول يقول لا ها من انعكاس الشمس الصور تطلع مب واضحه -على منو ها الكلام؟-
- في لعبة صيد سمج ، المفروض الياهل يصيد و في النهايه يحصل سمجة قولدفيش جائزة .. لعبة وايد حلوه بس مافي سمجة
- المطعم شوي غالي ، بس يأدي الغرض اذا ناويين تيلسون وايد
- يا ريت لو كان في سكيوريتي على الباب .. صحيح ما يحتاي اذا الاهل موجودين .. بس من باب الاطمأنان
- و لا تنسون تمرون ستار بكس او المحطه تيبون معاكم كوفي حقكم -انتو الكبار- .. تتسلون و انتو تراقبون الصغاريه
هاي العاب عيالي المفضله .. خالد بولنغ ، و بسامي الي شفتوهن 
بس عطيتينا تقرير جميل عن المكان وإن شاءالله الجماعة في يتلافون الأشياء اللي قلت عنها .. ما أدري إذا عندهم بطاقات رضا المستهلك ..تقدرين تسجلين ملاحاظاتج هناك أو توصليها لإدارتهم..
