من عشر ايام تقريبا شفت في جريدة البيان اعلان لدورات للأطفال بتنعقد في وحده من مكتبات دبي العامه .. فقلت خلني اروح اشوف يمكن اودي الصغاريه .. و يوم سرت تفاجأت بصراحه لان في مكتبه منفصله للأطفال .. وايد .. وايد .. وايد حلوه .. الصوره الي فوق من تصويري -بسامي موجوده في الصوره بس عاطتنكم ظهرها مشغوله بالتلوين- .. اول شي الديكور يشد الكبار قبل الصغار .. الموظفين من اروع ما يمكن .. طيبين و منظمين و يساعدون و يعرفون كيف يتعاملون من الصغار .. و الله تندمت كيف ما فكرت ابحث من قبل عن مكتبات الاطفال العامه هنه في دبي .. على الاقل يوم ني في الويكند اليهال يقدرون يزورون المكتبه و يستفيدون من مرافقها بدال يلسة البيت او سيرة المولات .. الحمدلله سوينا عضويه و بدينا نتسلف -قصدي نستعير- كتب من المكتبه -اول شي خالد بدأ الاستعاره و راح عند امينة المكتبه و سألها اقدر اتسلف الكتاب ، قالتله ما يقولن اتسلف يقولون استعير- .. يزاها الله خير صلحتله المعلومه و ضافتله كلمه يديده في قاموسه
اتمنى انكم تتصلون او تزورون اقرب فرع لكم و تشوفون شو الدورات المعروضه .. فعلا رائعه
و هذا رابط لموقع مكتبات دبي العامه