الساينس فير او المعرض العلمي لمدرسة الاتحاد السنه كان في 7/5 و خالد اصر يكون مشروعه عن سلسلة الغذاء .. و اقترحت عليه نسوي مشروع عن المجموعة الشمسية بس ما طاع .. و ما شاء الله وايد طلاب كانو مسوين عن سلسلة الغذاء -يمكن عشان جذه بغى يكون مثلهم او لانه معجب بموضوع سلسلة الغذاء و منبهر بكيفية اعتماد الكائنات الحية على بعض في التغذية- .. المهم .. هذا ما جادت به قريحتي السنة .. و اسمحولي ما صورت المجسم بروحه .. نسيت و الله
يبت علبة بلاستيكية فيها ادراج .. شلت الادراج .. و في مكانهم حطيت فلين عليه نوع من الكائنات الحية .. انتو شوفو و بتفهمون .. ما اعرف اشرح .. ما حصلت غير علبه ام ثلاث ادراج و انا كنت ابا بو درجين .. فاضطريت اني ابدع في الدرج الاساسي و حطيت شمس و ماي و تربه .. اونه النباتات تحتاج ها الثلاث اشياء عشان تنمو .. و الدرج الثاني نباتات بروحها .. و الدرج الثالث غزلان تتغذى على النباتات .. و آخر شي النمر يتغذى على الغزلان
لو بغيتو تسوون نفس المشروع بامكانكم تبدعون .. بس الاعتماد الكلي على توفر الالعاب الي بتستخدمونها في الشغل .. تعبت يلين ما لقيت النمر بالحجم الي اباه .. و اصلا انا ما كان يبا (نبات-غزال-نمر) .. كان يبا (حشرات-ارنب-ثعبان-بومه) .. بس ما حصلنا الارانب و البومه .. فنصيحه للأمهات .. اي وقت تحصلون فيه الحيوانات البلاستيكيه -بكل الاحجام- اشتروها و خزنوها لان بتحتاجونها في اشغال المدرسة

خالد و مشروعه

هاي صورة ممكن اوضح بس بدون الطبقة الاولى .. و في الصوره هيا مسويه زياره لخالد

من اجمل و ابدع المشاريع الي كانت في المعرض .. لعبدالله صديق خالد .. و كان عن اختلاف النباتات .. تسلم افكارج يام عبدالله -يا فنانه-

و هاي المبدعة بسمة مع مشروعها .. طالبين منهم اي عمل عن دورة حياة اي حيوان .. فقررت هي تسوي عن الفراشة .. و هاي بكل صراحة فكرتها .. و هي قررت شو تستخدم من خامات .. بايب كلينرز و بوم بومز .. كل القص انا سويته و ساعدتها في اللزق