ما تتصورون شكثر استانست يوم لقيت ها الموقع .. و شكله ما شاء الله وايد حلو و جذاب و يلفت انتباه الاطفال بالوانه و رسوماته .. بس بعده مش شغال .. ما عليه بننتظر شوي .. و يمكن راعينه ياخذون بعين الاعتبار ملاحظاتي عليه -يمكن انا فرد واحد ما اسوي شي ، بس بقول رايي- .. عموما الموقع يهتم بهوايات و نشاطات و اهتمامات الاطفال و يشجعها .. حلو صح ؟ .. الجوانب الي مركزين عليها هي : الرياضه ، الحاسوب ، الموسيقى ، الفنون ، الازياء ، الديانه ، العلوم و الصحافة .

ياريت لو يلغون موضوع الموسيقى -لانه ما منه فايده- و بعد حاطين اكثر شخصية جذابه هي المهتمه في ها الشي .

و لو لاحظتوا -للي دخل الموقع- حاطين الطفل الاماراتي هو الي مهتم بالدين و شال في يده مصحف و مسباح -ليش؟ .. عشان لابس كندوره يعين؟- و ها الحمدانيه الخضراء ياريت لو يغيرون لونها

البنت الاماراتيه ، صح اسمها عربي اصيل بس غير منتشر بين البنات الاماراتيات .. يعني مثلا موزه ، حصه ، مريم .. مقنع اكثر .. و يمسحون الروج من عا بوزها لانها البنيه الوحيده الي حاطه روج ، وبعدين المفروض عمرها 9 سنوات -و ها السن ما يحطون مكياج-

انا ملاحظاتي بسيطه ، بس فعلا تأثر في الاطفال .. و نحن ككبار ممكن نعتبرها اشياء بسيطه و هينه بس تأثيرها على الاطفال غير عنا

و الله يوفق اصحاب الموقع لكل مافيه خير .. و بتم اتابعهم يلين ما يشتغل موقعهم كامل و نقدر نستخدمه