الي لاحظته ان كل ام او ابو اعرفهم دايما يمدحولي المدرسه الي عيالهم فيها .. و انها احسن مدرسه .. عشان جي كنت واااااااااااايد محتاره في اي مدرسه احط عيالي .. الكل يمدحلي مدرسته .. و بعد كمن زياره لكمن مدرسه هنه في بوظبي ، ما اقتنعت بولا وحده خصوصا اني حريصه على اللغه العربيه و التربيه الاسلاميه .. كان خاطري يكون في فرع لمدرسة الابداع العلميه مالت الشارجه عدنا في بوظبي .. بس للأسف ماشي .. بس الحمدلله مره كنت اتصفح جريدة الاتحاد و قريت عن مؤتمر تعريفي لمدرسة الاتحاد لانهم بيفتحون فرع في بوظبي .. اخوي متخرج من مدرسة الاتحاد فرع الممزر ، بس الي كنت اذكره انها كانت مثل اي مدرسه خاصه ثانيه

و حضرنا المؤتمر .. و اشكر ربي اني حضرته ، عرفت منهم ان المدرسه وايد اتغيرت عن اول و نظامهم وايد تحسن و صار في اهتمام كبير باللغه العربيه و التربيه الاسلاميه و القرآن -و هذا الي انا اباه- بالاضافه لاهتمامهم اجتماعيا بالطفل و مش بس اكاديميا .. بصراحه على كثر ما استانست في المؤتمر بس كنت خايفه انه يكون مجرد كلام

و بدأ خالد حياته الدراسية مع افتتاح مدرسة الاتحاد فرع بوظبي .. و اكتشفنا ان ما كان في اي مبالغه في المؤتمر ، كانوا عند حسن الظن .. و كل شي قالوه كان متحقق في المدرسه او يسعون جاهدا لتحقيقه .. بارك الله في كل العاملين في المدرسه و بارك الله في خالد ، لان حبيبي نجاحه في المدرسه يعتمد عليه

و السنه بسامي بدأت .. و هاي صورتها في اول يوم و هي داخله المدرسه .. ما شاء الله عليها مطلعتلي قرون ، اكاديميا ما عليها اي كلام .. ذكيه و سريعة بديهة و تبغي تتعلم .. بس مشكلتها عنيدة و راسها يابس و ما تسمع الكلام ، و شغالين عليها في المدرسه يروضون ها الطبع فيها .. و الحمد لله في تحسن ملحوظ -بس يلين ما حطولها نجمه ، ان شاء الله قريب-