استعادة الروتين المعهود ايام الدراسه
طبعا خلال الصيف تتغير وايد اشياء مثل نظام النوم ، و الاكل ، و عدد ساعات اللعب .. فيفضل قبل ما تبدأ المدرسه باسبوع تقريبا تعديل ساعات النوم مثل ما كانت قبل و تنظيم وقت الطفل .

الاستعداد للمدرسه
شراء او تفصيل مراييل المدرسه الجديده .. شنطة المدرسه و القرطاسيه .. كل ها الاشياء تحمس الطفل و حتى الام على بدأ مشوار المدرسه الجديد .

خذي بيد طفلك
اذا كانت المدرسه جديد على طفلك ، فحاولي انك تكونين معاه اول يوم عشان تدلينه صفه او المرافق الثانيه في المدرسه مثل مكان دورة المياه و المقصف .

التحدث مع المعلمه
لا بأس بالتحدث مع المعلمه اذا بغيتي تخبرينها عن اي شي يهمج بخصوص الطفل مثل اي مشاكل صحيه او تربويه .. الهدف التعاون بين البيت و المدرسه و عشان ما يتعرض الطفل لاي شي يضايقه او يحرجه .

التحدث مع الطفل
ذكريه باصدقاءه الي ما شافهم خلال الاجازه الصيفيه و كيف بيشوفهم اول يوم دراسي .. تكلمي معاه عن بعض ذكريات المدرسه الايجابيه الي حصلت السنه الي فاتت و لا تذكرينه باي شي كدره خلالها .. و ممكن تكلمينه عن ذكرياتج انت الشخصيه في المدرسه .. كلميه عن اهمية الدراسه و دور المعلم و الطاقم التدريسي .. و ممكن عن التحديات الي بتواجه خلال الدراسه و كيف يتصرف معاها

التنظيم
خليه يستعد للمدرسه بنظام .. ليلة اول يوم دراسي يجهز ملابسه و اغراضه الجديده و حتى يشارك بافكار لشنطة الاكل او الlunch box و شو يبا يحط فيها

الهدوء و الاسترخاء
لا تخوفين الطفل بتهويل رهبة اول يوم دراسي ، حسسي الطفل بمتعة الذهاب للمدرسه و الاشياء الحلوه الي بتصادفه و الي بيستفيدها من المدرسه عموما .. يعني شجعيه باسلوب حلو و خفيف و لا تحسسينه بعظم مسؤولية الدراسه

المعلومات ترجمتها من ها المقال .. اضغط هنا